කොළඹ විශ්ව විද්‍යාලයේ ශ්‍රී පාලී මණ්ඩපයේ ජනමාද්‍ය අධ්‍යන අංශය යටතේ ක්‍රියාත්මක කැම්පස් රේඩියෝව (Campus Radio) රාජ්‍ය විශ්වවිද්‍යාල පද්ධතිය සතු සක්‍රීයම ප්‍රජා ගුවන්විදුලියයි. ශ්‍රී පාලී මණ්ඩපයේ ජනමාද්‍ය අධ්‍යන අංශය මගින් පිරිනමන ජනමාධ්‍ය විශේෂවේදී උපාධියට අත්වැලක් හා වටිනාකමක් එකතු කිරීමට කැම්පස් රේඩියෝව සමත් බව සතුටින් මතක් කර සිටිමු. www.campusradio.lk යන වෙබ් පිටුව ඔස්සේ වෙබ් රේඩියෝවද, Campus Radio නමින් Facebook පිටුවක් මෙන්ම YouTube නාලිකාවක්ද කැම්පස් රේඩියෝව හරහා සක්‍රීයව ක්‍රියාත්මක වේ. සෑම වසරකම කැම්පස් රේඩියෝවේ නිල විකාශන කටයුතු භාර වන්නේ තෙවන වසර විද්‍යාර්ථින්ටයි.
කොළඹ විශ්ව විද්‍යාලයේ ශ්‍රී පාලි මණ්ඩපයේ , කැම්පස් රේඩියෝ ප්‍රජා ගුවන්විදුලියේ 2021 නව කළමනාකාර මණ්ඩලය පත්වීමෙන් පසුව, නව කළමනාකාරීත්වය යටතේ සිදුකළ පළමු වැඩසටහන ලෙස සරසවි මාධ්‍යයේ සහෘද ප්‍රයාමය “සම්භාෂණ 2021” හඳුන්වා දීමට හැකිය. ජනමාධ්‍ය පිළිබඳව හදාරන සහ ජනමාධ්‍ය පිළිබඳව උනන්දුවක් දක්වන ග්‍රාහක පිරිස උදෙසා වැඩමුළුවක් පැවැත්වීම අපගේ ප්‍රධාන අරමුණ බවට පත්විය. එහිදී විශ්වවිද්‍යාල විද්‍යාර්ථීන්, මෙන්ම ජනමාධ්‍ය පිළිබඳ දැනුම සොයා යන බොහෝ පිරිසකට දැනුම බෙදා දෙන්නට සම්භාෂණ 2021 ජන මාධ්‍ය වැඩමුළු මාලාව ඔස්සේ හැකියාව ලැබුණි. සම්භාෂණ 2021 වැඩමුළු මාලාව ඔක්තෝබර් මාසයේ සති හතරක් පුරාවට සති අඟ සෙනසුරාදා සහ ඉරිදා දිනවල පැවැත්වුණු අතර සවස 6 සිට 8 දක්වා පැය දෙකක කාලයක් වැඩමුළුව ඔස්සේ දැනුම බෙදා ගැනීමට සැලසුම් කොට තිබුණි. එහි අනුව Zoom තාක්ෂණය ඔස්සේ පැවැත්වූ මෙම වැඩමුළු මාලාව තුළින් ජනමාධ්‍ය විෂය ක්ෂේත්‍රයේ ඇති තෝරාගත් පැතිකඩ කිහිපයක් පිළිබඳව සාකච්ඡා කෙරුණි. මාධ්‍ය ක්ෂේත්‍රය ගැන උනන්දුවක් දක්වන 500 කට ආසන්න පිරිසක් සම්බන්ධ වූ අතර උත්සවය පිළිබඳව ඉතා හොඳ ප්‍රතිපෝෂණ ලබා දෙන ලදී. උපකුලපති මහාචාර්ය චන්ද්‍රිකා එන් විජයරත්න මහත්මිය, මණ්ඩපාධිපති ආචාර්ය ප්‍රතිභා මහානාමහේවා මහතා, අධ්‍යයනාංශ ප්‍රධානී (ජනමාධ්‍ය) ආචාර්ය කුමුදුනී මද්දුමගේ මහත්මිය, මහාචාර්ය ටියුඩර් වීරසිංහ මහතා සහ ජ්‍යෙෂ්ඨ කථිකාචාර්ය කලණි ධර්මසිරි මහත්මිය සහාය දැක්වූහ.
