කොළඹ විශ්වවිද්‍යාලයේ ශ්‍රීපාලි මණ්ඩපයේ ජනමාධ්‍ය අධ්‍යනාංශය යටතේ ක්‍රියාත්මක වන කැම්පස් රේඩියෝ ප්‍රජා ගුවන්විදුලිය පසුගිය පොසොන් පොහොය දිනයේ පළතුරු අච්චාරු දන්සලක් සංවිධානය කරන ලදී. රටේ පවතින මෙවන් දුෂ්කර කාල සීමාවක වුවද මෙවැනි කටයුත්තක් සංවිධානය කිරීමට කැම්පස් රේඩියෝ අපට හැකියාව ලැබුනේ ශ්‍රීපාලි මණ්ඩපයේ කථිකාචාර්යවරුන්ගෙන් සහ සිව් වසරක සහෝදරත්වයෙන් ලද නොමද සහයෝගය නිසාවෙනි. පොහොය දිනයේ උදෑසන සිටම සංවිධානය කල මෙම දන්සල හොරණ – කළුතර මාර්ගයේ ශ්‍රීපාලි මණ්ඩපයට ප්‍රවේශ වන මාර්ගය අසල සවස 3.00 ට ගරු මණ්ඩපාධිපති ආචාර්ය ප්‍රතිභා මහනාමහේවා මහතාගේ සහ ස්ථීර ශිෂ්‍ය උපදේශක, කැම්පස් රේඩියෝ උපදේශිකා කලනි ඉරෝෂා ධර්මසිරි මහත්මියගේ ප්‍රධානත්වයෙන් ආරම්භ විය. ප්‍රජා මූලික වැඩසටහනක් වශයෙන් ක්‍රියාත්මක වූ මෙම දන්සල වෙත හොරණ ප්‍රදේශවාසී බොහෝ දෙනා රැස්වී සිටියේය. එමෙන්ම පළතුරු අච්චාරු දන්සල ආවරණය කිරීම සඳහා මාධ්‍ය අනුග්‍රහය ආයතන කිහිපයකින්ම ලබා දුනි. ඒ අතර දෙරණ මාධ්‍යයේ “ලෝකයෝ සහ ලෝකයෝ” වැඩසටහනේ විශේෂ අවධානයක් අපගේ දන්සල වෙත යොමු වී තිබුණි. මෙම දන්සල ප්‍රදේශවාසී සියලු දෙනාගේ පැසසුමට ලක් වූ අතර ඇතැමුන් අපත් සමඟ දොඩමලු වී සිසිල් පැන් ලබා දීමටත් කටයුතු කළේය. කැම්පස් රේඩියෝ ප්‍රථම වරට සංවිධානය කළ මෙම දන්සල ව්‍යාපෘතිය ඉතා සාර්ථකව අවසන් කිරීමට හැකිවීම සහ ප්‍රජාව සමඟ සම්බන්ධ වීමට අවස්ථාවක් ලැබීම තුලින් මණ්ඩපය අවට ප්‍රදේශ වාසීන් සමග ඇති බැදීම් වර්ධනය කර ගැනීමට හැකි වීම මහගු අවස්ථාවකි.
