Sri Palee Campus Cricket Tournament 2022
කොළඹ විශ්වවිද්‍යාලයේ ශ්‍රීපාලී මණ්ඩපයේ කැම්පස් රේඩියෝව සහ ක්‍රීඩා අංශය එක්ව සංවිධානය කළ සුහද ක්‍රිකට් තරඟාවලියක් 2022 ඔක්තෝබර් 4 වන දින පැවැත්විණි. ඔන්ලයින් තාක්ෂණය ඔස්සේ දීර්ඝ කාලයක් ගත කළ ඒකාකාරී අධ්‍යාපනයෙන් මිදී වසර හතරක සිසුන් සමඟ සුහදව ගත කිරීම මෙහි මූලික අරමුණ විය. හොරණ මහජන ක්‍රීඩාංගණයේදී දිවාකාලය පුරා පැවැති තරගාවලිය සඳහා වසර හතරක කාන්තා සහ පිරිමි කණ්ඩායම් 8ක් සහ අධ්‍යයන අනධ්‍යයන කාර්ය මණ්ඩල කාන්තා හා පිරිමි කණ්ඩායම් හතරක් සහභාගි වූහ. තරග වට අවසානයේ කාන්තා අංශයේ අවසන් මහා තරගයට දෙවැනි වසරේ කණ්ඩායම සහ පළමු වසරේ කාන්තා කණ්ඩායම තේරී පත් විය. පිරිමි කණ්ඩායම් අතරින් දෙවැනි වසරේ කණ්ඩායම සහ අනධ්‍යයන කාර්ය මණ්ඩල කණ්ඩායම අවසන් මහා තරගයට සුදුසුකම් ලබා ගත්හ. ශ්‍රීපාලී ක්‍රිකට් තරගාවලියේ පිරිමි ශූරතාව ප්‍රතිවාදී පිලට ඉතා ප්‍රබල අභියෝගයක් ලබාදෙමින් දෙවැනි වසරේ කණ්ඩායමට හිමිවිය. ප්‍රබල තරග වටයක් අවසානයේ දෙවැනි වසරේ කාන්තා අංශය ශූරියන් බවට පත්වීමට සමත් විය. සමස්ත තරගාවලියේ දක්ෂතම පිතිකරුවා (පිරිමි අංශය) තෙවැනි වසරේ විදුර වික්‍රමාදර හිමිකරගත් අතර පළමු වසරේ කාන්තා අංශයේ දක්ෂතම පිතිකරුවා බවට පත්වූයේ උමාෂා නෙත්මිණිය. පිරිමි අංශයේ දක්ෂතම පන්දු යවන්නා ලෙස රවිඳු තත්සර ද, කාන්තා අංශයේ දක්ෂතම පන්දු යවන්නිය ලෙස දෙවැනි වසරේ සඳමාලි මධුභාෂිණී ද සම්මාන ලැබූහ.මෙම අවස්ථාවට කොළඹ විශ්වවිද්‍යාලයේ ශ්‍රිපාලි මණ්ඩපයේ ගරු මණ්ඩපාධිපති තුමා ඇතුළු සම්භාවනීය අමුත්තන් රැසක් සහභාගි වූහ. විශ්වවිද්‍යාල ශිෂ්‍ය ප්‍රජාව අතර සහයෝගය ශක්තිමත් කිරීම සඳහා කැම්පස් රේඩියෝව ඉදිරිපත් කළ තවත් වැඩසටහනක් සාර්ථකව මෙසේ අවසන් විය.
