කොළඹ විශ්වවිද්‍යාලයීය ශ්‍රී පාලි මණ්ඩපයෙහි ජනමාධ්‍ය අධ්‍යයන අංශය තුළ ක්‍රියාත්මක වන සක්‍රීයතම සංගමයක් වන කැම්පස් රේඩියෝව ප්‍රථම වරට සංවිධානය කරන “Colombo Clicks 2022” ජංගම දුරකථන ඡායාරූපකරණ තරගාවලිය, කොළඹ විශ්වවිද්‍යාලයේ පළමු, දෙවන, තෙවන සහ සිව්වන වර්ෂයන් නියෝජනය කරමින් ඕනෑම අධ්‍යයන අංශයක දැනට අධ්‍යයන කටයුතු වල නියැලෙන සියළුම විද්‍යාර්ථින් වෙනුවෙන් විවෘත තරගයක් ලෙස ක්‍රියාත්මක වේ. මෙම තරගාවලිය කොළඹ විශ්වවිද්‍යාලයීය ප්‍රජාව උදෙසා පමණක් පැවැත්වෙන අතර, සියලුම තරගකරුවන් මාර්ගගත ක්‍රමවේද ඔස්සේ අන්තර්ජාලය හරහා ප්‍රථමයෙන් ලියාපදිංචි කිරීම සිදු කෙරේ. ඉන් අනතුරුව ඔවුන් තරගයට ඉදිරිපත් කිරීමට බලාපොරොත්තු වන ඡායාරූපය අප විසින් ලබාදෙන සබැඳිය හරහා නියමිත දිනට පෙර උඩුගත කිරීම කළ යුතු විය. එලෙස යොමු කෙරෙන ඡායාරූප තෝරා ගැනීම සඳහා ඡායාරූපකරණ ක්ෂේත්‍රයේ න්‍යායාත්මක සහ ප්‍රායෝගික දැනුමෙන් පරිපූර්ණ වූ විද්වත් විනිශ්චය මණ්ඩලයක සහය ලබා ගැනුණි. ඔවුන්ගේ ඒකමතික තිරණයට අනුව අවසන් තරග වටයට තේරී පත්වන ඡායාරූප අතුරින් “ප්‍රශස්තම ඡායාරූපය“ තරඟ අංශයේ පළමු, දෙවන තෙවන ස්ථාන ත්‍රිත්වයත්, කුසලතා සහතික ලාභීන් 10 දෙනෙකුත් තෝරා පත්කර ගැනීම සිදු කරයි. මෙලෙස තෝරාගැනීමෙන් පසු ඉතිරි වන තරගකරුවන්ගේ ඡායාරූප 80ක් “ජනප්‍රියම තරග අංශය“ සඳහා ඉදිරිපත් කෙරෙන අතර එහි ප්‍රථම, දෙවන සහ තෙවන ස්ථාන තෝරා පත්කර ගැනීමේදී කැම්පස් රේඩියෝ නිල ෆේස්බුක් පිටුව හරහා එම ඡායාරූප වෙත ලැබෙන මනාප සංඛ්‍යාව ගණනය කිරීම මගින් සිදු වේ. මීට අමතරව තරගාවලිය සඳහා නිර්මාණ භාර ගැනෙන කාල සීමාව අතරතුර තෝරාගත් දිනයක තරගකරුවන් සහ ඡායාරූපකරණය කෙරෙහි ඇල්මක් දක්වන පිරිස වෙනුවෙන් මාර්ගගත වැඩමුළුවක් පැවැත්වීමට කටයුතු කලෙමු. එහිදී ක්ෂේත්‍රයේ ප්‍රායෝගික අත්දැකීම් බහුල ඡායාරූප ශිල්පීන්ගේ සහභාගීත්වයෙන් අදාල දේශන පැවැත් වූ අතර එහිදී ජංගම දුරකථන ඡායාරූපකරණය හරහා අනාගතයේදී වෘත්තිමය ඡායාරූපකරණයට යොමු වීමට අවශ්‍ය මාවත සකස් කරගන්නා ආකාරය පිළිබඳව තරගකරුවන් දැනුවත් කිරීම ද සිදු කෙරේ. තරගාවලියේ අංශ ත්‍රිත්වය යටතේ ජයග්‍රහණ ලබාගන්නා තරගකරුවන් ඇගයීම උදෙසා උත්සවයක් අප විසින් සංවිධානය කිරීමට බලාපොරොත්තු වන අතර එහිදී ජයග්‍රාහකයන්ට කුසලාන, සහතිකපත් සහ ත්‍යාග ලබා දීමට අපේක්ෂා කරන්නෙමු.
